Ака уйӑхӗн 22-мӗш кунӗнче Урхас Кушкӑри пӗтӗмӗшле пӗлÿ паракан вӑтам шкулта пысӑк уяв пулса иртрӗ . Уява 11 класра вӗренекенсем  Саша Герасимовпа  Чӑваш Республики Пуҫлӑхӗн стипендиачӗ  Алина Иванова ертсе пычӗҫ.
     Илемлӗ  пилӗк хӗр упраҫ «Чӑваш пики» конкурса пуҫтарӑнчӗ. Вӗсем Оля Ильина, Даша Терентьева (11 кл.), Ирина Михайлова (9кл.),  Карина Тюменевӑпа Аня Григорьева (8 кл.). Капӑр тумланнӑ пикесем  ҫав тери илемлӗ, илӗртÿллӗ те ҫепӗҫ.Паянхи Илемписем сцена ҫине тухсан вӗсене куракансем тӑвӑллӑн алӑ ҫупса кӗтсе илчӗҫ. Пикесем хӑйсем ҫуралса ÿснӗ ҫӗршыв историне , йӑли- йӗркине , сӑмахлӑхне аван пӗлнипе савӑнтарчӗҫ. Урхас Кушкӑ пикисем ҫавӑн пекех  апат ҫимӗҫ пӗҫерес вӑрттӑнлӑха пӗлни те жюри членӗсене  тӗлӗнтерчӗ. Вӗсем тутлӑ кукӑльсем пӗҫерсе килнӗ. Пикесем уйрӑмах сӑвӑ калассипе, чӑваш ташшине ташлассипе  пултаруллӑ пулчӗҫ.
     Жюри членӗсем  пӗтӗмлетÿ туса «Чи пултаруллӑ пике», «Ӑс пике», «Ӗҫчен пике», «Сӑпайлӑ пике»  номинаципе  пикесене чысларӗҫ. «Чӑваш пики» ята 11 класра вӗренекен  Чӑваш Республики Пуҫлӑхӗн стипендиачӗ Ольга Ильина   тивӗҫрӗ. Конкурса хутшӑннӑ пур пултаруллӑ пикесене  те тав тӑватпӑр.

                                                                           Фотоотчет